ਕੂੜੇ ਦੀ ਸਮੱਸਿਆ ਦੇ ਹੱਲ ਲਈ ਹੰਸਪਾਲ ਬ੍ਰਦਰਜ਼ ਦੀ ਨਵੀਂ ਪਹਿਲ, ਪੰਜ ਗਾਰਬੇਜ ਲੋਡਰ ਤਿਆਰ; ‘ਪੈਰਿਸ ਆਫ ਪੰਜਾਬ’ ਦੀ ਪੁਰਾਣੀ ਪਛਾਣ ਵਾਪਸ ਲਿਆਉਣ ਦਾ ਉਪਰਾਲਾ
Kptnews Bureau Special Story
ਕਪੂਰਥਲਾ। ਕਦੇ ਹਰਿਆਲੀ ਅਤੇ ਸਾਫ਼-ਸਫ਼ਾਈ ਲਈ ‘ਪੈਰਿਸ ਆਫ ਪੰਜਾਬ’ ਵਜੋਂ ਜਾਣਿਆ ਜਾਂਦਾ ਕਪੂਰਥਲਾ ਸ਼ਹਿਰ ਅੱਜ ਕਈ ਥਾਵਾਂ ’ਤੇ ਸੜਕਾਂ ਦੇ ਕਿਨਾਰੇ ਲੱਗੇ ਕੂੜੇ ਦੇ ਢੇਰਾਂ ਕਾਰਨ ਸਫ਼ਾਈ ਦੀ ਸਮੱਸਿਆ ਨਾਲ ਜੂਝ ਰਿਹਾ ਹੈ। ਇਸ ਸਮੱਸਿਆ ਦੇ ਹੱਲ ਲਈ ਕਪੂਰਥਲਾ ਦੇ ਹੰਸਪਾਲ ਬ੍ਰਦਰਜ਼ ਨੇ ਨਵੀਂ ਪਹਿਲ ਕਰਦਿਆਂ ਵੈਸਟ ਮੈਨੇਜਮੈਂਟ ਲਈ ਪੰਜ ਗਾਰਬੇਜ ਲੋਡਰ ਤਿਆਰ ਕੀਤੇ ਹਨ।
ਆਰਸੀਐੱਫ ਨੇੜੇ ਰੇਲ ਕੰਪੋਨੈਂਟ ਤਿਆਰ ਕਰਨ ਵਾਲੇ ਹੰਸਪਾਲ ਟਰੇਡਰਜ਼ ਦੇ ਮਾਲਕ ਪ੍ਰਿਤਪਾਲ ਸਿੰਘ ਹੰਸਪਾਲ ਅਤੇ ਦਵਿੰਦਰਪਾਲ ਸਿੰਘ ਹੰਸਪਾਲ ਨੇ ਟਰਾਇਲ ਦੇ ਤੌਰ ’ਤੇ ਇਹ ਗਾਰਬੇਜ ਲੋਡਰ ਤਿਆਰ ਕੀਤੇ ਹਨ। ਇਨ੍ਹਾਂ ਦਾ ਮੁੱਖ ਮਕਸਦ ‘ਬਿਨਾਂ ਹੱਥ ਲਾਏ ਕੂੜਾ ਸਾਫ਼ ਹੋ ਜਾਵੇ’ ਦੀ ਥੀਮ ਨੂੰ ਅਮਲੀ ਰੂਪ ਦੇਣਾ ਹੈ।
ਪ੍ਰਿਤਪਾਲ ਸਿੰਘ ਹੰਸਪਾਲ ਨੇ ਦੱਸਿਆ ਕਿ ਸ਼ਹਿਰ ਵਿੱਚ ਕੂੜੇ ਦੇ ਢੇਰਾਂ ਨੂੰ ਜੇਸੀਬੀ ਰਾਹੀਂ ਇਕੱਠਾ ਕਰਕੇ ਟਰਾਲੀਆਂ ਵਿੱਚ ਭਰਨ ਦੀ ਪ੍ਰਕਿਰਿਆ ਵਿੱਚ ਕਾਫ਼ੀ ਸਮਾਂ ਲੱਗਦਾ ਹੈ। ਇਸ ਨੂੰ ਆਟੋਮੇਸ਼ਨ ਰਾਹੀਂ ਤੇਜ਼ ਕਰਨ ਦੇ ਵਿਚਾਰ ਨਾਲ ਉਨ੍ਹਾਂ ਨੇ ਇਹ ਗਾਰਬੇਜ ਲੋਡਰ ਤਿਆਰ ਕੀਤੇ ਹਨ। ਉਨ੍ਹਾਂ ਅਨੁਸਾਰ ਕਰੀਬ ਚਾਰ ਕੁਇੰਟਲ ਵਜ਼ਨ ਵਾਲੇ ਇਨ੍ਹਾਂ ਲੋਡਰਾਂ ਦੀ ਉਚਾਈ ਲਗਭਗ 18 ਫੁੱਟ ਤੱਕ ਹੈ ਅਤੇ ਇਨ੍ਹਾਂ ਦੀ ਮਦਦ ਨਾਲ ਕੂੜਾ ਸਿੱਧਾ ਟਰਾਲੀ ਵਿੱਚ ਲਿਫਟ ਕੀਤਾ ਜਾ ਸਕਦਾ ਹੈ।
-ਤਿੰਨ ਤਰ੍ਹਾਂ ਦੇ ਮਾਡਲ ਤਿਆਰ-
ਹੰਸਪਾਲ ਬ੍ਰਦਰਜ਼ ਨੇ ਦੱਸਿਆ ਕਿ ਇਨ੍ਹਾਂ ਗਾਰਬੇਜ ਲੋਡਰਾਂ ਦੇ ਵੱਖ-ਵੱਖ ਮਾਡਲ ਤਿਆਰ ਕੀਤੇ ਗਏ ਹਨ। ਇੱਕ ਮਾਡਲ ਨੂੰ ਮੈਨੂਅਲ ਹੈਂਡਲ ਰਾਹੀਂ ਚਲਾਇਆ ਜਾ ਸਕਦਾ ਹੈ, ਜਦਕਿ ਦੂਜਾ ਮੋਟਰ ਰਾਹੀਂ ਬਿਜਲੀ ਨਾਲ ਅਤੇ ਤੀਜਾ ਬੈਟਰੀ ਨਾਲ ਚੱਲੇਗਾ। ਬੈਟਰੀ ਵਾਲੇ ਮਾਡਲ ਨੂੰ ਨਿਗਮ ਦੀ ਟਰਾਲੀ ਵਿੱਚ ਲੱਗੀ ਬੈਟਰੀ ਨਾਲ ਵੀ ਚਲਾਉਣ ਦੀ ਯੋਜਨਾ ਹੈ।
ਉਨ੍ਹਾਂ ਮੁਤਾਬਕ ਇੱਕ ਲੋਡਰ ਇੱਕ ਟਰਾਲੀ ਦੇ ਕਰੀਬ ਕੂੜੇ ਨੂੰ ਇਕੱਠਾ ਕਰ ਸਕਦਾ ਹੈ। ਜੇਕਰ ਕੂੜਾ ਵੱਡੇ ਟਿੱਪਰ ਵਿੱਚ ਪਾਉਣਾ ਹੋਵੇ ਤਾਂ ਇਸ ਦੀ ਉਚਾਈ ਨੂੰ ਲੋੜ ਅਨੁਸਾਰ ਵਧਾਇਆ ਵੀ ਜਾ ਸਕਦਾ ਹੈ।
-ਘੱਟ ਮੈਨਪਾਵਰ ਨਾਲ ਤੇਜ਼ੀ ਨਾਲ ਹੋਵੇਗੀ ਸਫ਼ਾਈ-
ਹੰਸਪਾਲ ਬ੍ਰਦਰਜ਼ ਦਾ ਕਹਿਣਾ ਹੈ ਕਿ ਇਸ ਤਕਨੀਕ ਨਾਲ ਜਿੱਥੇ ਗਾਰਬੇਜ ਪੁਆਇੰਟਾਂ ਦੀ ਸਫ਼ਾਈ ਬਿਹਤਰ ਹੋਵੇਗੀ, ਉੱਥੇ ਘੰਟਿਆਂ ਦਾ ਕੰਮ ਮਿੰਟਾਂ ਵਿੱਚ ਪੂਰਾ ਕੀਤਾ ਜਾ ਸਕੇਗਾ। ਇਸ ਨਾਲ ਮੈਨਪਾਵਰ ਦੀ ਲੋੜ ਵੀ ਘੱਟ ਹੋਵੇਗੀ। ਉਨ੍ਹਾਂ ਦਾ ਮਕਸਦ ਹੈ ਕਿ ਸ਼ਹਿਰ ਦੇ ਵੱਖ-ਵੱਖ ਗਾਰਬੇਜ ਪੁਆਇੰਟਾਂ ’ਤੇ ਇਹ ਲੋਡਰ ਲਗਾ ਕੇ ਕੂੜੇ ਦੇ ਢੇਰਾਂ ਦੀ ਸਮੱਸਿਆ ਨੂੰ ਘਟਾਇਆ ਜਾਵੇ।
ਦਵਿੰਦਰਪਾਲ ਸਿੰਘ ਹੰਸਪਾਲ ਨੇ ਦੱਸਿਆ ਕਿ ਇਸ ਪਾਇਲਟ ਪ੍ਰੋਜੈਕਟ ਸਬੰਧੀ ਨਗਰ ਨਿਗਮ ਨਾਲ ਸੰਪਰਕ ਕੀਤਾ ਗਿਆ ਹੈ। ਉਹ ਇਸ ਸਬੰਧੀ ਡਿਪਟੀ ਕਮਿਸ਼ਨਰ ਕਪੂਰਥਲਾ ਆਕਾਸ਼ ਬਾਂਸਲ ਨਾਲ ਵੀ ਮੁਲਾਕਾਤ ਕਰਨਗੇ, ਤਾਂ ਜੋ ਇਸ ਨੂੰ ਗਾਰਬੇਜ ਕਲੈਕਸ਼ਨ ਪੁਆਇੰਟਾਂ ’ਤੇ ਸਥਾਪਤ ਕਰਨ ਬਾਰੇ ਵਿਚਾਰ ਕੀਤਾ ਜਾ ਸਕੇ।
ਉਨ੍ਹਾਂ ਦੱਸਿਆ ਕਿ ਉਹ ਖੁਦ ਪੰਜ ਸਾਲ ਤੱਕ ਕੌਂਸਲਰ ਰਹਿ ਚੁੱਕੇ ਹਨ ਅਤੇ ਸ਼ਹਿਰ ਵਿੱਚ ਰੋਜ਼ਾਨਾ ਕਰੀਬ 20 ਤੋਂ 25 ਟਰਾਲੀਆਂ ਕੂੜਾ ਨਿਕਲਦਾ ਹੈ। ਕਈ ਥਾਵਾਂ ’ਤੇ ਇਹ ਕੂੜਾ ਸੜਕਾਂ ਦੇ ਕਿਨਾਰੇ ਅਤੇ ਧਾਰਮਿਕ ਸਥਾਨਾਂ ਦੇ ਨੇੜੇ ਵੀ ਪਿਆ ਰਹਿੰਦਾ ਹੈ, ਜਿਸ ਨਾਲ ਸ਼ਹਿਰ ਦੀ ਸੁੰਦਰਤਾ ਪ੍ਰਭਾਵਿਤ ਹੁੰਦੀ ਹੈ।
-‘ਨੋ ਲੌਸ-ਨੋ ਪ੍ਰਾਫਿਟ’ ’ਤੇ ਮੁਹੱਈਆ ਕਰਵਾਉਣ ਦੀ ਪੇਸ਼ਕਸ਼-
ਗਾਰਬੇਜ ਲੋਡਰ ਦੀ ਕੀਮਤ ਬਾਰੇ ਪੁੱਛੇ ਜਾਣ ’ਤੇ ਹੰਸਪਾਲ ਬ੍ਰਦਰਜ਼ ਨੇ ਕਿਹਾ ਕਿ ਉਹ ਆਪਣੇ ਕੰਮ ਨੂੰ ਸੇਵਾ ਭਾਵਨਾ ਨਾਲ ਕਰਦੇ ਹਨ। ਜੇਕਰ ਸ਼ਹਿਰ ਜਾਂ ਪਿੰਡਾਂ ਵਿੱਚ ਲੋਕ ਇਸ ਨੂੰ ਆਪਣੇ ਪੱਧਰ ’ਤੇ ਲਗਾਉਣਾ ਚਾਹੁੰਦੇ ਹਨ ਤਾਂ ਉਹ ਇਸ ਨੂੰ ‘ਨੋ ਲੌਸ-ਨੋ ਪ੍ਰਾਫਿਟ’ ਦੇ ਆਧਾਰ ’ਤੇ ਮੁਹੱਈਆ ਕਰਵਾਉਣ ਲਈ ਤਿਆਰ ਹਨ।
-ਡੀਸੀ ਬੋਲੇ—ਹੰਸਪਾਲ ਬ੍ਰਦਰਜ਼ ਨੂੰ ਜ਼ਰੂਰ ਮਿਲਾਂਗਾ-
ਡਿਪਟੀ ਕਮਿਸ਼ਨਰ ਕਪੂਰਥਲਾ ਆਕਾਸ਼ ਬਾਂਸਲ ਨੇ ਕਿਹਾ ਕਿ ਉਨ੍ਹਾਂ ਦੇ ਧਿਆਨ ਵਿੱਚ ਆਇਆ ਹੈ ਕਿ ਹੰਸਪਾਲ ਬ੍ਰਦਰਜ਼ ਇਸ ਸਬੰਧੀ ਕੁਝ ਕੰਮ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਜੇਕਰ ਹੰਸਪਾਲ ਬ੍ਰਦਰਜ਼ ਮਿਲ ਕੇ ਇਸ ਦੇ ਆਪਰੇਸ਼ਨ ਦੀ ਪ੍ਰਕਿਰਿਆ ਸਮਝਾਉਂਦੇ ਹਨ ਤਾਂ ਉਹ ਜ਼ਰੂਰ ਮਿਲਣਗੇ। ਜੇਕਰ ਇਹ ਪ੍ਰਬੰਧ ਸ਼ਹਿਰ ਵਾਸੀਆਂ ਦੀ ਸਹੂਲਤ ਲਈ ਬਿਹਤਰ ਸਾਬਤ ਹੁੰਦਾ ਹੈ ਤਾਂ ਇਸ ਨੂੰ ਅਮਲ ਵਿੱਚ ਲਿਆਉਣ ਬਾਰੇ ਵਿਚਾਰ ਕੀਤਾ ਜਾਵੇਗਾ।
-ਹੜ੍ਹਾਂ ਦੌਰਾਨ ਵੀ ਸੇਵਾ ਭਾਵਨਾ ਨਾਲ ਬਣਾਈਆਂ ਸਨ 100 ਕਿਸ਼ਤੀਆਂ-
ਜ਼ਿਕਰਯੋਗ ਹੈ ਕਿ ਹੰਸਪਾਲ ਬ੍ਰਦਰਜ਼ ਨੇ ਸਾਲ 2025 ਦੀਆਂ ਹੜ੍ਹਾਂ ਦੌਰਾਨ ਲੋਕਾਂ ਦੀ ਮਦਦ ਲਈ ਆਪਣਾ ਰੇਲ ਕੰਪੋਨੈਂਟ ਬਣਾਉਣ ਦਾ ਕੰਮ ਰੋਕ ਕੇ ਛੋਟੀਆਂ ਕਿਸ਼ਤੀਆਂ ਤਿਆਰ ਕਰਨੀਆਂ ਸ਼ੁਰੂ ਕੀਤੀਆਂ ਸਨ। ਹੰਸਪਾਲ ਟਰੇਡਰਜ਼ ਵੱਲੋਂ ਸੇਵਾ ਭਾਵਨਾ ਨਾਲ ਕਰੀਬ 100 ਕਿਸ਼ਤੀਆਂ ਤਿਆਰ ਕਰਕੇ ਪੰਜਾਬ ਸਮੇਤ ਹੋਰਨਾਂ ਸੂਬਿਆਂ ਵਿੱਚ ਭੇਜੀਆਂ ਗਈਆਂ ਸਨ। ਇਸ ਉਪਰਾਲੇ ਦੀ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਪੱਧਰ ’ਤੇ ਵੀ ਸ਼ਲਾਘਾ ਹੋਈ ਸੀ। ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਨੇ ਵੀ ਵੀਡੀਓ ਕਾਲ ਰਾਹੀਂ ਪ੍ਰਿਤਪਾਲ ਸਿੰਘ ਹੰਸਪਾਲ ਨਾਲ ਗੱਲਬਾਤ ਕਰਕੇ ਉਨ੍ਹਾਂ ਦੇ ਸੇਵਾ ਕਾਰਜ ਦੀ ਸ਼ਲਾਘਾ ਕੀਤੀ ਸੀ।
